Pulsar sobre as imaxes para ver os documentos.
Estas son as contas das festas da Pedra presentadas na última asamblea da Asociación de Veciños celebrada o día 22 de Novembro. Expóñense públicamente aquí porque A XENTE TEN DEREITO A COÑECELAS.
As contas expóñense tal e como foron presentadas, sen manipulación e sen textos resaltados.
O que máis chama atención destas contas son os máis de 2000€ que se pagaron á xente que foi pedir donativos. Decláranse como "Traballo de...". Houbo xente que cobrou en ocasións máis de 500€, sen contrato nin seguro.
Desde a Plataforma maniféstase a nosa profunda indignación por ese feito. Nunca a comisión de festas da Pedra, da que formaran parte en anos anteriores membros da Plataforma, cobrara un peso por percorrer a parroquia.
Os membros da Plataforma sempre pagaron do seu propio peto todos os gastos, houbera que ir pola parroquia ou ata a Coruña e sempre rexeitaron os donativos que lles foron ofrecidos. A xunta rectora non ten ningunha xustificación para pagar a ninguén por ir pedir.
Desde a Plataforma tememos que detrais deste feito se oculte a intención de organizar unha nova REDE CACIQUIL na parroquia, onde os afíns ao poder reciban gratificacións pola súa lealtade e se lle dea esta mensaxe á xente: "SE ESTADES CON NOSOUTROS, ALGO VOS PODE TOCAR".
Outro punto que chama a atención é a ausencia de numeración nos recibos dos donativos. Sen numeración non se poderá saber nunca a cantidade recibida polos cobradores.
A Asamblea
Entre os temas tratados destacan:
- O Presidente amosa a súa disconformidade coa Alcaldía, considerando que discrimina á parroquia, opinión compartida por moitos dos seus veciños.
- O pleito para recuperar o terreo do xeriátrico custaría arredor de 8000€. A Plataforma exixe que sea o anterior Presidente e non a parroquia o que asuma eses gastos.
- A Asociación ten previsto realizar varias pistas seguindo o seu propio criterio.
- A rectora actual continúa a traballar coa avogada que cobrou os 17000€ (retención incluida) da Comunidade de Montes. Seguen o camiño dos anteriores.
- Ante a solicitude de varios veciños de amosar as contas do cementerio, a rectora actual négase a facilitar as contas da Comisión Xestora.
A Plataforma entregou a seguinte nota informativa, que o presidente leu en alto, como é o seu deber:
A asistencia á Asamblea foi mínima, unhas trinta persoas, na súa maior parte favorábeis á xunta rectora, polos motivos enunciados antes. O resultado da asamblea foi a aprobación de todos os puntos propostos pola xunta rectora. A xente da Pedra é maior e moita dela non ten gana de asistir a este tipo de abusos.
Autoritarismo
Antes de comezar a asamblea produciuse un feito bochornoso para toda a parroquia. O presidente expulsou da Asamblea a un fillo do Portavoz da Plataforma pola Defensa dos Intereses da Pedra. O argumento: a Asociación é unha entidade privada e el non era socio.
Antes de retirarse pacíficamente, tivo tempo de tirar unha foto e capturou o momento.
O valor que durante tanto tempo non tiveron para enfrentarse aos de chupaban antes, téñeno agora para botar fóra ao fillo dun veciño que intentar aclarar e amosar a verdade á parroquia.
Aclaración final
A esta situación chégase pola cantidade de tropelías cometidas polos anteriores e amenaza con continuar no futuro. Se se fixeran as cousas ben e non houbera a intención clara de tapar o saqueo anterior, este blog non existiría e a parroquia estaría en paz.
Por outra banda, ante os rumores de ser esta unha campaña organizada pola actual corporación municipal, a Plataforma négaos taxantemente. Esta plataforma está composta por xente de moi diferentes ideoloxías, unidas por un interese común: a defensa dos intereses da parroquia. A Plataforma non favorece nin perxudica a ningún partido concreto: simplemente expón os feitos e os documentos para que sexan coñecidos por todos os interesados, isto é, a xente da parroquia da Pedra e outras parroquias veciñas.
Manuel Villar "Cabaleiro"
32.605.341N